Taith Patagonia Siôn Brynach's Patagonia Trek
Hydref 2008 October

05:02 - 17/10/2008

Awr i fynd cyn cyrraedd Buenos Aires a brecwast wedi bod. Wedi bod yn eistedd rhwng Pat Ashcroft a Rob Clements y tro hwn hefyd - mae'n edrych fel petaent wedi ein trefnu yn ôl trefn y wyddor.

07:42 - Coffi yn awyrenfa Buenos Aires - wedi tsiecio'r bag i mewn i fynd i El Calafate ac yn eistedd mewn caffi. Cwpwl yn eistedd y tu ôl i mi a'r weinyddes yn holi beth oedent ei eisiau a hithau'n dweud 'dim'!

11:56 - Ar y drydedd awyren mewn 24 awr - y tro hwn yn hedfan o Buenos Aires i El Calafate. Wedi cael eistedd wrth y ffenest y tro hwn a gweld yr arfordir a'r paith. Islaw mae 'na byllau mawr sy'n edrych fel petaent yn llawn halen yn hytrach na dŵr.

12:04 - Newydd hedfan dros Benrhyn Valdes - lle byddwn ddydd Iau. Mae'r tirwedd yn edrych yn ddiddorol heb sôn am y bywyd gwyllt.

15:33 - ar y bws o El Calafate i El Chalten - gweld guanaco o ffenest y bws. Mynyddoedd rhew i'w gweld o'r awyren wrth i ni basio Lago Argentina jyst cyn i ni lanio.

23:30 – Wedi cyrraedd El Chalten a’r gwesty. Cawod hyfryd a dillad glan cyn swper mewn gwesty cyfagos. Lot o hwyl a Rhobert ap Steffan yn ei hwyliau. Fory – y mynyddoedd ond heno yn El Chalten sydd â theimlad gwirioneddol o dref ffin. Tai tin ac adeiladau newydd ym mhob man. Cŵn mawr blewog ger bob tŷ. Mae’r gwynt yn chwibanu tu allan i’r ffenest felly Duw a ŵyr sut fydd hi yn gwersylla nos yfory!

17:22 - 18/10/2008

Yn eistedd ar graig o fewn golwg i’r Glacier de los Tres – rhewlif mawr sy’n gorffen mewn llyn. Yn tynnu at ddiwedd taith y diwrnod cyntaf. Roedd hi’n sych wrth adael El Chalten ond y glaw wedi dod o fewn 5 munud i ymadael. Pawb wedi bod yn gwisgo dillad glaw trwy’r dydd ond ar y cyfan cawodydd fu hi.
Y llwybr heddiw wedi bod trwy’r goedwig ar y cyfan ond taith ar ddiwedd y dydd i weld y rhewlif – tipyn o olygfa!

18:47 – Bellach wedi cyrraedd y gwersyll a chael paned o goffi. Y wyneb yn teimlo wedi cael gwynt er gwaetha’r stwff haul.
Yn edrych ymlaen at swper – ddim yn edrych ymlaen cymaint at y noson gyntaf dan ganfas – yn enwedig os fydd y glaw yn para.

21:44 – yn y babell – ddim yn rhy oer eto, ond cawn weld sut fydd hi toc. Swper yn dda iawn chwarae teg o ystyried ein byd yng nghanol nunlle. Dyfyniad y dydd – Louise wrth Debs “Can I put my hand in your armpit?”

11:12 – 19/10/2008

Wedi bod yn cerdded ers 08:30. Noson iawn tan rhyw 04:00 pan fu’n rhaid codi i fynd i’r tŷ bach – ar ôl hynny wedi rhynnu gan fod eira yn disgyn – ac roedd yn drwch erbyn y bore. Codi a phacio rhwng saith a hanner awr wedi, ac yna gael brecwast.
Gadael y gwersyll am hanner awr wedi wyth a dipyn o eira yn syrthio wrth i ni gerdded. Y tirwedd yn debyg i ddoe – coed a pherthi a’r golygfeydd o’r mynyddoedd dan eira yn hyfryd.

17:11 – Wedi cyrraedd y gwersyll nesaf, sydd gerllaw Lago Capri, ar ôl prynhawn caled. Roedd yr eira yn drwm iawn prynhawn ‘ma a phawb wedi rhynnu rhywfaint amser cinio er ein bod wedi aros mewn man cysgodol yn y coed.

Unwaith y cychwynnodd yr eira o ddifri – a’r gwynt - roedd hi’n nos ar gael unrhyw olygfa. Roedd gorwelion pawb wedi ei gyfyngu i’r hyn y medrent ei weld allan o’r slit yn yr hugan – a sach y person oedd yn cerdded o’i flaen.
Roeddwn yn falch o gyrraedd y gwersyll felly – a chael paned dwym. Mae’r staff yn gweithio yn galed iawn i’n bwydo a chael y gwersyll yn barod.
Wedi’r baned aeth criw i lawr at Lago Capri am dro a chael dyfyniad y dydd gan John – “Mae’n nhw wedi ei alw fe’n Lago Capri sbo am ei fod e’r un tymheredd â’r Capri arall”. Roedd yr eira’n syrthio’n drwm ar y pryd.
Swper am saith. Lleucu wedi ei throi hi’n ôl am El Chalten ar ôl bod yn sâl ers ddoe druan. Mae’n gobeithio ail-ymuno â ni fory ar ôl cael noson mewn gwely yn y gwesty.
Yn y babell drws nesaf heno mae Pat a Mair – sydd wedi dal ati yn wych er eu bod yn 70+ a 60+ yn eu tro. Mair mae’n debyg wedi cyrraedd gwersyll neithiwr a holi lle’r oedd y bloc toiledau a’r bwyty! Afraid dweud taw twll yn y ddaear yw’r tŷ bach a phabell gantîn sy’n darparu’r bwyd. Er ei siom neithiwr, mae wedi cerdded yn wych heddiw.
Iolo wedi dangos baw Puma i ni bore ‘ma felly maen nhw o gwmpas! Wedi gweld austral finch prynhawn ‘ma – ond dim Condors heddiw er i ni weld dau ddoe. Anodd gweld dim heddiw a dweud y gwir oherwydd yr eira. Yn paratoi felly am ail noson o wersylla yn yr eira.

18:36 – newydd fod yn tynnu lluniau o’r Cara Cara Cribog – yn ôl Iolo yn un o deulu’r fran – ond yn aderyn mawr cydnerth, lliwgar a deallus ac yn fusneslyd sef pam y bu modd mynd ato.

11:52 – 20/10/2008 – Glacier Piedras Blancas.

Y maes serax yn amlwg iawn arno – wedi bod yn cerdded ers ychydig dros dair awr a chyrraedd y rhewlif rhyfeddol hwn. Y rhewlif yn dod o lethrau Mynydd Fitzroy / Chalten sydd wedi bod yn gwmni cyson heddiw. Cychwynom ar hyd yr un llwybr â ddoe – ond yn gweld pethau heddiw. Wedi gweld baw Puma eto heddiw yn ogystal ag ôl traed llwynog yn yr eira.
Noson erchyll o oer neithiwr -10°C mae’n debyg ac -3°C wedi ei fesur y tu mewn i un o’r pebyll.

13:20 – cinio ac rydym newydd adael Parc Cenedlaethol Los Glaciares. Mae rhywfaint yn gynhesach heddiw na ddoe er yn oerach na’r diwrnod cynt hefyd.
Roedd tipyn o eira yn y gwersyll bore ‘ma – ar ben y babell ac ar lawr. Yn syth ar ôl codi aeth Paul (yr wyf yn rhannu pabell ag ef) a minnau am dro i’r bryniau ger y gwersyll i weld yr haul yn codi.
Yn ddiweddarach fe euthum gyda Mair i gasglu dŵr yfed o’r llyn (Lago Capri) a’i photel ddŵr hi yn swfenir o rhyw Fordaith a gafodd rhywdro – y ddau eithaf – mordaith a threcio!
Enw cyfanswandd am drecwyr – “A compeed of trekkers”

17:50 – Wedi cyrraedd y gwersyll yn Piedra Del Fraile a hwn yw’r gorau o ddigon – dim eira, caban yn hytrach na phabell i fwyta ynddi a phabell ychydig yn fwy na’r rhai blaenorol i gysgu ynddi. Mae hefyd 1,000 o droedfeddi yn is na’r gwersylloedd blaenorol – felly’n debyg o fod rhywfaint yn gynhesach dros nos – diolch byth.
Wedi gweld llawer o bethau heddiw gan gynnwys cnocelli’r coed a baw Puma – fe welson hwnnw o fewn ychydig amser i adael y gwersyll a hwnnw’n gynnes o hyd. Fe welais i sgwarnog hefyd nid nepell o’r gwersyll hwn. Tro hir heddiw fodd bynnag – 10 milltir a chryn dipyn o ddringo yn ogystal â golygfeydd bendigedig. Roedden’ ni’n ffodus iawn i gael gweld mynydd Fitzroy / Chalten heddiw ac yn drawiadol ein bod ni wedi cerdded ar hyd yr un llwybr â ddoe ond wedi gweld cymaint yn fwy heddiw. Ddoe dim ond cefn y person o’n blaen yr oedd modd ei weld.
Wedi bod yn siarad â Sergio, un o’r tywyswyr ac yntau wedi rhoi’r ddau hanes am sut y cafodd Monte Electrico ei enw – un stori yw fod yr offeiriad lleol, (Maria de Agostini) wedi rhoi’r enw iddo gan fod sŵn y gwnt yn chwyrlio o’i gwmpas yn debyg i storm drydannol – sy’n beth prin yn yr ardal hon. Y stori arall yw fod y mynydd (y medrwn ei weld o’r gwersyll) ag un wyneb coch ac un du – ac felly fel dwy derfynell batri.

22:04 – Yn y babell ac yn y gwely – mor braf cael cychwyn y nos yn gwisgo dim ond y thermals (h.y. dim cot blu na’r crys fleece gan Rab – neu hyd yn oed y ddau fel y bu hi’r nosweithiau diwethaf).
Y caban wedi bod yn llawn hwyl a chanu heno – ac yn gynnes hefyd gyda’r tân coed. Yn ddiau heddiw fu diwrnod y golygfeydd hyd yma. Mynydd Fitzroy / Chalten i’w weld yn glir llawer o’r bore (h.y. heb gymylau drosto) ac eira ar y copaon i gyd. Roedd hi’n wych cael gweld y bywyd gwyllt hefyd fel sgwarnog a’r cnocellod. Mae’r golygfeydd o’r rhewlifoedd wedi bod yn drawiadol hefyd.
Fory y drefn fydd codi am saith, brecwast am hanner awr wedi ac yna mynd i fyny heibio Lago Electrico i weld Rhewlif Pollone. Yn edrych ymlaen! Bydd dim rhaid cario’r bag llawn fory chwaith gan ein bod yn gwersylla yma eto nos yfory. Mae nghoesau i yn stiff heno felly bydd cael llwyth ysgafnach yfory yn fendith.

10:27 – 21/10/2008

Wedi cychwyn ers cyn 09:00 ac yn awr yn cael ysbaid uwchben Lago Electrico. Newydd dynnu llun o Club Moss – y mae Ieuan yn dweud a greodd lo yn yr oesoedd a fu. Heddiw rydym ar ein ffordd i fyny i weld rhewlif y Gendarme Pollone sy’n llifo i lawr wyneb gogleddol mynydd Fitzroy / Chalten. Bore ‘ma roedd hi’n awyr las o ben bore ac fe euthum allan yn gynnar i dynnu lluniau ar lan afon Electrico. Roedd y mynyddoedd yn fendigedig yn haul y bore.

17:58 – Wedi cael diwrnod bendigedig – yn dringo i fyny i weld rhewlif Pollone a oedd yn gwbwl anhygoel. Roedd y rhewlif yn dod i lawr un o lethrau mynydd Chalten / Fitzroy. Ar waelod y rhewlif roedd ‘na lyn (Laguna Pollone) gyda’r dŵr wedyn yn llifo i lawr llethr ac i Lago Electrico sy’n troi yn ei dro yn Rio Electrico. Roedd yr haul yn tywynnu trwy’r bore er fod yn gwynt yn chwyrlio o gwmpas. Cafodd y cinio ei fwyta ar lan y Laguna Pollone. Roeddem yn ôl yn y gwersyll cyn hanner awr wedi un, felly prynhawn ‘ma aeth criw bach ohonom am dro yn y goedwig gyda Iolo er mwyn chwilio am adar ond dim llawer o lwc.

18:10 – Newydd fod yn edrych ar y map gyda Pepe ac wedi gweld pa mor agos yr y’m ni at y ffin gyda Chile – yn llythrennol o fewn 5/6 Km i’r ffin. Soniodd hefyd fod y lama yn dod yn wreiddiol o Ogledd yr Ariannyn a taw’r guanaco yw’r aelod o‘r teulu sy’n dod o’r dalaith hon ond i’w gweld yn y gwyllt ar y paith yn unig a dim yn y mynyddoedd.

Dyfyniad y dydd – disgrifiad o un o’r criw - “She’s got the face of a bulldog licking piss off a nettle”

20:52 – Wedi gorffen swper a hon mewn ffordd yw noson olaf y daith gerdded – felly cryn rialtwch. Pepe a’i griw tywyswyr wedi cael tip a gasglwyd oddi wrthym – ac yn ei llwyr haeddu – maen nhw wedi bod yn wych.
Gwynt a glaw y tu allan felly neb yn awyddus iawn i adael clydwch y caban bwyd. Heddiw – a’i haul – wedi bod yn uchafbwynt da, ond heb yr eira fuasai’r mynyddoedd ddim wedi edrych cystal. Bydd hi’n rhyfedd nos yfory cychwyn ar y teithio ar fws ac awyren eto. Bydd hi’n ddifyr cael gweld Trelew, Porth Madryn a Dyffryn Camwy fodd bynnag.

16:00 – 22/10/2008

Ar y bws yn ôl i awyrenfa El Calafate. Bore ‘ma roedd y rwtîn yr un fath ag arfer – codi am 07:00, brecwast am 07:30 a gadael y gwersyll am 8:40 ar ôl yr ymarferion cynhesu am 08:30. Dair awr yn ddiweddarach roeddem wedi cyrraedd y ffordd gerllaw pont dros y Rio Electrico. Pawb ar fysys bach wedyn yn ôl i dref El Chalten. Fe gawsom y bagiau a’r pethau eraill a oedd wedi eu cadw yn yr hostel yn El Chalten yn ôl cyn mynd i’r un bwyty â nos Wener i gael cinio. Wedi cinio aeth Melfyn ac Elfed a minnau am dro chwim i weld a allem ffeindio siop a oedd yn gwerthu pethau a fyddai’n addas fel anrhegion ac fe brynais fap o’r ardal a chrysau-t i Mali a Pwyll. Doedd dim un digon bach yno i Amig.
Mae’n newid mawr o fod yn y gwyllt i fod yn ôl yng ‘ngwareiddiad‘, ac wedi bod yn newid chwim a digon anodd. Mae’n anodd dygymod â’r sŵn yn un peth. Mae wedi bod yn brofiad gwych cael bod yn y mynyddoedd y pump diwrnod diwethaf.
Anodd ‘sgrifennu llawer – y ffordd hon heb dar arni, felly’n arw iawn.

21:02 – Ar yr awyren o El Calafate i Drelew. Hyd yn oed yn anos bod yn ôl yn holl brysurdeb yr awyrenfa nag oedd hi i fod yn El Chalten. Hiraeth mawr am y mynyddoedd!
Ar ôl cyrraedd El Calafate roedd y ffôn yn gweithio eto felly rhoddais ganiad adref yn syth (roedd hi’n 22:00 adref) a chael gair gyda Cath, Mam, Dad a Pwyll a oedd wedi codi ar ôl clywed y ffôn yn canu.
Yn edrych ymlaen at gyrraedd y gwesty ym Mhorth Madryn ymhen y rhawg. Bydd angen cawod cyn mynd i’r gwely – heb ymolchi’n iawn ers 5 diwrnod felly bydd haen o faw i’w olchi bant.
Ar fin glanio yn Nhrelew felly rhaid tewi.

Hanes y daith yn nhalaith Chubut

23:59 – Yng ngwesty El Cid ym Mhorth Madryn – wedi cael cawod am y tro cyntaf ers bore Sadwrn. Bendigedig!

08:11 – 23/10/2008

Ar y bws yn teithio tuag at Benrhyn Valdes i weld y morfilod. Brecwast am saith a gadael y gwesty am 07:30 oedd y drefn heddiw. Ar hyn o bryd yn croesi’r paith a Fred y tywysydd yn dweud taw un rheswm am boblogrwydd cig oen Patagonia yw fod y defaid yn yfed dŵr hallt y paith ac yn bwyta’r perthi yn hytrach na glaswellt. Yn aros ym Mhorth Madryn neithiwr a heno. Heb gysgu’n dda neithiwr – cyfuniad o fod yn or-gyfforddus ac ofn codi’n hwyr a cholli’r bws!

12:12 – Yn ôl ar y bws ar ôl bod yn gwylio’r morfilod. Roedd hi’n brofiad anhygoel bod mor agos at y creaduriaid bendigedig hyn. Roedd sawl mam a’i llo ymhlith y rhai a welsom ac fe fu rhai ohonynt yn neidio o'r’môr. Rhyfeddol!

12:36 – Newydd weld Rhea – fel estrys bach – yn cerdded ar y paith gyda sawl cyw bach.

12:36 – Mara – anifeiliaid bach maint sgwarnog ond yn edrych mwy fel mochyn cwta. Del iawn – newydd weld teulu ohonynt.

12:57 – Puerto Delgado. Cinio.

16:38 – Cinio mewn bwyty gerllaw goleudy Delgado – ac yna’r profiad gwych o fynd i lawr i’r traeth i weld y morloi eliffant. Mae’r prif wryw yn cadw harem ac yn ymosod ac ymladd gydag unrhyw wryw arall sy’n bygwth. Gall rhai ohonynt bwyso hyd at 3.5 tunnell fetrig ac ar y cyfan mae nhw’n llwyddo i aros ar y brig a rheoli’r harem am 3 neu 4 mlynedd cyn cael ei ddisodli. Mae’r ymladd yn gallu bod yn chwyrn a gwaedlyd. Roedd hi’n ddoniol gweld y llanciau yn chwarae ymladd yn y dŵr bas. Yn ôl yn awr i Borth Madryn

18:15 – wedi gweld sawl guanaco ar y daith heddiw – maen nhw’n anifeiliaid gosgeiddig iawn ac yn llai na’r lama.

08:21 – 24/10/2008

Ar y ffordd eto o Borth Madryn tuag at Drelew a Dyffryn Camwy. Neithiwr oedd noson y cinio ‘gala’ felly mae ‘na lot o wynebau blinedig a llygaid ‘bloodshot’ heddiw. Roedd rhai ohonynt ar y traeth o hyd am 04:00 bore ‘ma.
Newydd weld morfil yn neidio o’r môr wrth i ni deithio ar hyd promenâd Porth Madryn. Mae traeth Porth Madryn yn edrych yn ddigon tebyg i’r hyn a welodd y Cymru yn ôl ym 1865 ond mae gweddill Porth Madryn wedi newid y tu hwnt i bob llefelaeth. Cyn gadael y dre ry’n ni am fynd i weld yr ogofau lle bu’r Cymry yn byw (neu o bosib ddim yn byw!) yn dilyn y glaniad.

08:49 – Mae gweld yr ogofau yn cyfleu menter y gwladychwyr, yn enwedig o ystyried cyn lleied yr oedd ganddynt o’i cymharu â ni. Rhaid ei bod wedi bod yn erchyll o galed am gyfnod hir wedi’r glaniad, yn enwedig gan fod y paith yn go anffrwythlon.

09:28 – Un o’r pethau mwyaf doniol neithiwr yn y cinio ‘gala’ oedd gweld Mair sy’n 60+ yn ceisio perswadio’r ‘waiter’ yn y bwyty i drwco crysau. Roedd y pŵr dab wedi ei frawychu gan yr hen fenyw fach benderfynol! Bu cryn dipyn o ganu ‘Oes gafr eto?’ (neu ‘Wes gafr eto?’ os taw Eurfyl oedd yn codi canu) hefyd – felly Duw yn unig â ŵyr beth oedd barn pobl y bwyty. Fe ges i ddihangfa rownd yr hanner nos pan holodd un o staff Mencap i fi hebrwng Lleucu yn ôl i’r gwesty. Roeddwn i’n falch bore ‘ma pan fu’n rhaid codi cyn saith i gael brecwast.
Ar ein ffordd nawr tua’r Ysgol Gymraeg yn y Gaiman. Ry’n ni’n ffodus i gael haul ac awyr las eto heddiw er ei bod braidd yn wyntog.
Mwy o forfilod i’w gweld yn y môr wrth i ni deithio’n ôl trwy Borth Madryn.

09:32 – Wedi llwyddo i gael anrhegion i Amig a Cath brynhawn ddoe. Roeddwn i wedi prynu crys-t i Amig yn awyrenfa El Calafate ond fe’i gadawyd ar yr awyren yn Nhrelew. Un o’r pethau trawiadol am yr yr awyrenfa yn Nhrelew oedd gweld y gair ‘Croeso’ uwchlaw’r fynedfa i’r terminal. Wedi cael bag suede i Cath ddoe. Roedd merch y siop yn hyfforddi i fod yn gyfieithydd felly pan ddywedais fod Cath hefyd yn gyfieithydd fe baciwyd y bag mewn papur brown a bow goch arno hefyd, chware teg iddi. Mae crys-t Amig yn nodi ei fod yn dod o ‘Puerto Madryn’.

10:11 – Sid (arweinydd y daith o du Across the Divide) newydd dweud fod ein ehediad i Buenos Aires heno gyda Aerolineas Argentians wedi ei chanslo – felly mae’n bosib na fydd modd i ni fynd i’r Eisteddfod yn Nhrelew prynhawn ‘ma – tipyn o siom. Mwy o wybodaeth toc – ond mae Aerolineas Argentinas yn ddiawliaid diegwyddor! Newydd weld rhai o’r camlesi dyfrio a fu mor allweddol i gael y paith i flodeuo a chynhyrchu cnydau i’r ymfudwyr Cymreig.

11:30 – newydd adael ysgol uwchradd Camwy. Wedi cyflwyno’r llyfrau i’r plant. Gavin wedi rhoi lamp lowyr i amgueddfa’r dref, a Ieuan wedi cyflwyno’r llwy garu a gerfiodd ei hun i’r ysgol. Roedd maer y dref, Gabriel Restucha, yno hefyd ac yn siarad Cymraeg yn lew.
Profiad rhyfeddol gweld y plant bach Archentaidd yno yn gwisgo crysau’r ysgol â “Gorau Arf, Arf Dysg” arnynt. Yn awr oherwydd diawlineb Aerolineas Argentians ry’n ni ar ein ffordd i’r awyrenfa i hedfan i Buenos Aires – ry’n ni’n colli cael mynd i’r Eisteddfod yn Nhrelew felly, sy’n siom go ddifrifol!

Fred y tywysydd sydd wedi bod y gyda ni ers i ni lanio yn Nhrelew echnos yn dweud ein bod wedi teithio 600km yn y bws ers hynny.

13:53 – Ar yr awyren o Drelew i Buenos Aires – yn ymlwybro tua’r rhedfa ar hyn o bryd. Siom o’r mwyaf oedd fod rhaid i ni adael Dyffryn Camwy mor chwim er mwyn dal yr awyren gynharach i Buenos Aires – ac wrth gwrs golli’r eisteddfod yn Nhrelew. Yn awyren yn codi …

Rhyw awr a hanner yw’r daith ar yr awyren y tro hwn. Y môr i’w weld yn y pellter a’r paith yn cyferbynnu â glas y môr.
Mae’r cyfnod yn ardal Camwy wedi bod yn ddiddorol iawn er mor fyr. Wedi cael map o barthau El Calafate a Penryn Valdes / Porth Madryn i fynd adref i’r plant. O ddechrau’r daith adref heddiw rhaid cyfaddef mod i’n colli’r teulu.

14:09 – Newydd hedfan dros Benrhyn Valdes a thynnu lluniau ohono yn yr haul. Anodd credu taw dim ond ddoe yr oeddem ni yno.


Roedd rhai o’r criw yn ffarwelio â ni yn Nhrelew – roeddwn nhw’n aros ymlaen yno a ninnau yn gadael am Fuenos Aires. Arhosodd Rhobert ap Steffan yn y Gaiman, tra bod Elfed a’r lleill a oedd yn aros wedi dychwelyd i awyrenfa Trelew. Mi fydda i’n colli Elfed yn enwedig – bu’n gwmni da iawn am lawer o’r daith. Mae e’n aros ymlaen am ychydig wythnosau eto rwy’n credu yn yr Ariannyn gan dreulio peth amser yng nghyffiniau Camwy cyn teithio’n bellach i’r gogledd.

Wedi cael rhes i mi fy hun ar yr awyren hon. Mae’n braf medru gweld allan trwy’r ffenest hefyd – ar y daith o El Calafate i Drelew roedd fy sedd reit gerllaw’r injan felly welwn i ddim byd, heblaw gorchudd yr injan. Roedd hi’n swnllyd hefyd. Mae cinio ar y ffordd hefyd – mi fetia i taw brechdan gaws a ham fydd yr unig ddewis hyd yn oed i ni’r llysieuwyr. ‘Dyw dychymyg Aerolineas Argentinas ddim yn helaeth iawn. Un mantais o fod wedi hedfan nawr wrth gwrs yw ein bod ni o leiaf yn medru gweld ac wrth gwrs y cyfle i gael noson dda o gwsg cyn ymadael â’r Ariannyn nos yfory. Pe na bai’r trefniadau wedi newid byddai wedi bod yn 02:00 bore fory arnom yn cyrraedd Buenos Aires. Rhyw dda yn dod o bob drwg felly, er mor siomedig yw hi ein bod ni wedi colli’r eisteddfod yn Nhrelew.